Ապրիլի 21-ին «Երևան էքսպո» ցուցասրահում մեկնարկեց 16-րդ միջազգային մասնագիտացված «Կրթություն և կարիերա EXPO-2016» եռօրյա ցուցահանդեսը, որին մասնակցում էր նաև Հայաստանի ազգային պոլիտեխնիկական համալսարանը:
Բացումը տեղի ունեցավ «Երևան էքսպո» ցուցասրահի բակում՝ կրթությանը և կարիերային նվիրված հետաքրքիր շոու ծրագրով: Հանդիսավոր արարողությանը ՀԱՊՀ-ից ներկա էին ռեկտոր Ոստանիկ Մարուխյանը, ռեկտորի տեղակալ, ՈՒԽ նախագահ Գոռ Վարդանյանը, Միջազգային համագործակցության և զարգացման ծրագրերի գծով պրոռեկտոր Ռուբեն Աղգաշյանը, Գիտության և գիտատեխնոլոգիական համագործակցության գծով պրոռեկտոր Արեգ Գրիգորյանը, Ուսումնամեթոդական վարչության պետ, պրոռեկտոր Կարեն Արզումանյանը, Էներգետիկայի և էլեկտրատեխնիկայի ինստիտուտի տնօրեն Նորայր Հարությունյանը, ֆակուլտետների դեկաններ, դասախոսներ:
Այս տարի ՀԱՊՀ-ն ներկայացավ կրթական, գիտահետազոտական և միջազգային նորարարական ծրագրերով, «Պոլիտեխնիկ» պաշտոնաթերթի՝ «Կրթություն և կարիերա EXPO-2016»-ին նվիրված հատուկ համարով:
Պոլիտեխնիկի ուսումնալաբորատոր ամբողջ բազան ցուցահանդեսի այցելուներին ներկայացնելու նպատակով տաղավարին ներկառուցված էր գերզգայուն ինտերակտիվ մոնիտոր՝ «360stories» եռաչափ ակնոցներով: Այդ համակարգը թույլատրում է հենց տաղավարից անցկացնել վիրտուալ տուր՝ Պոլիտեխնիկում: Իսկ այցելուները Պոլիտեխնիկի ֆակուլտետների, ավագ դպրոցի և քոլեջի մասին մանրամասն տեղեկություններ ստացան տաղավարում առկա տեղեկատվական գրքույկներից, որտեղ ներկայացված էին նաև բուհի գիտական և նորարարական ենթակառույցները: ՀԱՊՀ ռեկտոր, պրոֆեսոր Ոստանիկ Մարուխյանը և ռեկտորի տեղակալ Գոռ Վարդանյանը գերզգայուն ինտերակտիվ մոնիտորով վիրտուալ տուր անցկացրին Պոլիտեխնիկում:
ՀԱՊՀ ավագ դպրոցի սան Հայկ Սաքոյանը փորձարկեց Ական հայտնաբերող ռոբոտի աշխատանքը: Հարցին, թե հետաքրքրվողներ եղե՞լ են իր գյուտով` որպես բանակի համար օգտակար մտահղացում, Հայկը պատասխանեց, որ համապատասխան կառույցները հետաքրքրված են:
Տաղավարում ներկայացված գավաթները վկայում էին Պոլիտեխնիկի ուսանողների՝ բազմաթիվ օլիմպիադաներում հաղթական ձեռքբերումների և ուսանողական հագեցած առօրյայի մասին:
Ցուցահանդեսը կազմակերպվել էր «Լոգոս էքսպո» կենտրոնի նախաձեռնությամբ, ՀՀ կրթության և գիտության նախարարության, Հայաստանի արդյունաբերողների և գործարարների միության աջակցությամբ, որի փակման հանդիսավոր արարողությունը տեղի ունեցավ ապրիլի 22-ին՝ «Ռոյալ թուլիփ գրանդ հոթել Երևան» հյուրանոցում: Հայաստանի ազգային պոլիտեխնիկական համալսարանից ներկա էին ՀԱՊՀ ռեկտորի տեղակալ Գոռ Վարդանյանը և Էներգետիկայի և էլեկտրատեխնիկայի ինստիտուտի տնօրեն Նորայր Հարությունյանը: Հանդիսության ժամանակ ցուցահանդեսի մասնակիցներին հանձնվեցին մասնակցության հավաստագրեր և ամփոփվեցին եռօրյա ցուցահանդեսի արդյունքները: ՀԱՊՀ-ի տաղավարը ճանաչվեց լավագույնը: «Լոգոս էքսպո» կենտրոնի տնօրեն Սուրեն Նազինյանը Գոռ Վարդանյանին հանձնեց «Լավագույն տաղավար»-ի հավաստագիրը:
Հ.Գ. Մայիսի 3-ի Ռեկտորատի նիստում ռեկտոր Ոստանիկ Մարուխյանը և ռեկտորի տեղակալ Գոռ Վարդանյանը «Կրթություն և կարիերա EXPO 2016» ցուցահանդեսում Հայաստանի ազգային պոլիտեխնիկական համալսարանը բարձր մակարդակով ներկայացնելու համար շնորհակալագրեր հանձնեցին ուսանողներ Գևորգ Հարությունյանին, Ջանիկ Սևոյանին, Արթուր Տոնոյանին, Հակոբ Պետրոսյանին, Խաչիկ Մանուկյանին, Ալեքսանդր Դռնոյանին, Արմեն Վարդանյանին: Շնորհավորանքներից հետո Գոռ Վարդանյանը նաև դահլիճին ներկայացրեց ՀԱՊՀ ռեկտոր Ոստանիկ Մարուխյանի անունով «Լոգոս Էքսպո» կենտրոնի տնօրեն Սուրեն Նազինյանի կողմից ստացված շնորհակալական նամակը: Նամակում տնօրենը շնորհակալություն էր հայտնում Պոլիտեխնիկին՝ ցուցահանդեսին լավագույնս ներկայանալու համար:
